ಅಮ್ಮ… ಪುಸ್ತಕಕ್ಕೆ ಅವರು ಚಿನ್ನದ ಗರಿ ಸಿಕ್ಕಿಸಿದ್ದಾರೆ!

ಎ ಆರ್ ಮಣಿಕಾಂತ್

ಅವರ ಹೆಸರು ಮಹಾದೇವ ಸ್ವಾಮಿ . ವರ್ಷದ ಹಿಂದೆ ಅವರು ಫೋನ್ ಮಾಡಿ ಹೇಳಿದರು : ” ೨೦೦೯ ರಲ್ಲಿ ನಾನು ಟಿ ಸಿ ಎಚ್ ಮಾಡಿಕೊಂಡ ಶಿಕ್ಷಕ ಆಗಿದ್ದೆ . ಆ ವರ್ಷದ ಜೂನ್ ತಿಂಗಳಲ್ಲಿ ಗೆಳೆಯನೊಬ್ಬ ನನಗೆ ಉಡುಗೊರೆಯ ರೂಪದಲ್ಲಿ ‘ಅಮ್ಮ ಹೇಳಿದ ಎಂಟು ಸುಳ್ಳುಗಳು’ ಪುಸ್ತಕವನ್ನು ಕೊಟ್ಟ . ಆ ಪುಸ್ತಕದಲ್ಲಿ ” ಸೈಕಲ್ ರಿಕ್ಷಾದವನ ಮಗ ಐ ಏ ಎಸ್ ಮಾಡಿದ” ಎಂಬ ಸ್ಟೋರಿ ಇದೆ . ಅದನ್ನು ಓದಿದ ನಂತರ – “ಎಲ ಎಲಾ , ಸೈಕಲ್ ರಿಕ್ಷಾದವನ ಮಗ ಐ ಏ ಎಸ್ ಮಾಡಲು ಸಾಧ್ಯ ಅನ್ನುವುದಾದರೆ, ನಾನು ಕನಿಷ್ಠ ಡಿಗ್ರಿ ಮಾಡಬಹುದಲ್ಲ ಅನ್ನಿಸಿತು . ಮುಕ್ತ ವಿ ವಿ ಯಲ್ಲಿ ಪದವಿ ಓದಲು ಶುರು ಮಾಡಿದೆ . ಕೊನೆಯ ವರ್ಷ ದ ಪರೀಕ್ಷೆ ಬರೆದಾಗಲೇ ಕೆ ಏ ಎಸ್ ಪರೀಕ್ಷೆ ಗೆ ಪತ್ರಿಕೆಯಲ್ಲಿ ಪ್ರಕಟಣೆ ಬಂತು . ಒಂದು ಕೈ ನೋಡೋಣ ಎಂದು ಪರೀಕ್ಷೆ ತಗೊಂಡಿದ್ದೇನೆ . ನನ್ನಲ್ಲಿ ಇಂಥದೊಂದು ಬದಲಾವಣೆ ಆಗಲಿಕ್ಕೆ ‘ಅಮ್ಮ ಹೇಳಿದ ಎಂಟು ಸುಳ್ಳುಗಳು’ ಪುಸ್ತಕವೇ ಕಾರಣ .ದಯವಿಟ್ಟು ಅಂಥದೇ ಇನ್ನೊಂದು ಪುಸ್ತಕ ಹೊರತನ್ನಿ… “

ನಾನು ‘ಅಪ್ಪ ಅಂದ್ರೆ ಆಕಾಶ’ ಪುಸ್ತಕ ಹೊರತರಲಿಕ್ಕೆ ಮಹಾದೇವ ಸ್ವಾಮಿ ಅವರ ಈ ಮಾತುಗಳೂ ಸ್ವಲ್ಪ ಮಟ್ಟಿಗೆ ಕಾರಣ . ಮುಂದೆ ನಾನು ಹೊಸ ಪುಸ್ತಕದ ಸಿದ್ದತೆಯ ಗಡಿಬಿಡಿಯಲ್ಲಿ ಮುಳುಗಿದ್ದಾಗಲೇ ಮತ್ತೆ ಮಹಾದೇವ ಸ್ವಾಮಿ ಫೋನ್ ಮಾಡಿ ಹೇಳಿದರು : “ಸಾರ್… ನನ್ನ ಕೆ ಏ ಎಸ್ ಪ್ರಿಲಿಮ್ಸ್ ಪಾಸ್ ಆಗಿದೆ . ಮುಖ್ಯ ಪರೀಕ್ಷೆಗೆ ಸಿದ್ದತೆ ನಡೆಸಿದ್ದೇನೆ . ಈ ಎಲ್ಲ ಬದಲಾವಣೆಗೆ ‘ಅಮ್ಮ ಹೇಳಿದ ಎಂಟು ಸುಳ್ಳುಗಳು’ ಪುಸ್ತಕವೇ ಕಾರಣ . ಒಂದು ಬೆಸ್ಟ್ ಆಫ್ ಲಕ್ ಹೇಳಿ …. ” (ತಮಾಷೆ ಎಂದರೆ ಅದುವರೆಗೂ ನಾನು ಮಹಾದೇವ ಸ್ವಾಮಿ ಅವರನ್ನು ನೋಡಿರಲಿಲ್ಲ . ಈಗ ಕೂಡ ಅವರನ್ನು ನೋಡಿಲ್ಲ . ಕೇವಲ ಎಸ್ ಎಂ ಎಸ್ ಮತ್ತು ಫೋನ್ ಮೂಲಕ ನಮ್ಮ ಮಾತು ಕಥೆ . ಅವರು ಮಳವಳ್ಳಿ ಹತ್ತಿರ ಶಿಕ್ಷಕರಂತೆ … )

ಸ್ವಾಮಿಯವರೇ, ನಿಮಗೆ ಯಾವತ್ತೂ ಗೆಲುವಾಗಲಿ. ಶುಭವಾಗಲಿ ಎಂದಿದ್ದೆ …

‘ಅಪ್ಪ ಅಂದ್ರೆ ಆಕಾಶ’ ಪುಸ್ತಕ ಬಿಡುಗಡೆಯ ದಿನ ಮಹದೇವಸ್ವಾಮಿ ಅವರನ್ನು ವೇದಿಕೆಗೆ ಕರೆದು ಗೌರವಿಸುವ ಉದ್ದೇಶ ಕೂಡ ನನ್ನದಿತ್ತು . ಆದರೆ ಪುಸ್ತಕ ಬಿಡುಗಡೆಗೆ ಎರಡು ದಿನ ಬಾಕಿ ಇದ್ದಾಗಲೇ ರಸ್ತೆ ಅಪಘಾತದಲ್ಲಿ ಸ್ವಾಮಿ ಅವರ ತಂದೆ ತೀರಿಕೊಂಡರು .ಹಾಗಾಗಿ ಸ್ವಾಮಿಯವರು ಕಾರ್ಯಕ್ರಮಕ್ಕೆ ಬರಲೇ ಇಲ್ಲ . ಮೊನ್ನೆ ಶುಕ್ರವಾರ ಮನೆ ತಲುಪಲು ಬಸ್ ಇಲ್ಲದೆ ಮೆಜೆಸ್ಟಿಕ್ ನಲ್ಲಿ ನಾನು ಪರದಾಡುತ್ತಿದ್ದಾಗ ಅದೇ ಮಹದೇವಸ್ವಾಮಿ ಮೆಸೇಜ್ ಕಳಿಸಿದರು : ಸರ್ , ನನ್ನ ನೆನಪಿದೆ ತಾನೇ?

ನಾನು ಮಹಾದೇವ ಸ್ವಾಮಿ . ನಿಮ್ಮ ಬರಹಗಳ ಅಭಿಮಾನಿ .’ ಅಮ್ಮ ಹೇಳಿದ ಎಂಟು ಸುಳ್ಳುಗಳು’ ಪುಸ್ತಕ ನನ್ನ ಬದುಕನ್ನೇ ಬದಲಿಸಿತು . ಕೆ ಏ ಎಸ್ ಪರೀಕ್ಷೆ ಬರೆದಿದ್ದೇನೆ ಅಂದಿದ್ದೆನಲ್ಲ : ಈಗ ಫಲಿತಾಂಶ ಬಂದಿದೆ . ೧೧೧ ನೆ ರಾಂಕ್ ಬಂದಿದ್ದೇನೆ . ಈಗ ಮತ್ತೆ ಶುಭ ಹಾರೈಸಿ … ಇವತ್ತು ನಾನು ಏನೇ ಆಗಿದ್ದರೂ ಅದಕ್ಕೆ ‘ ಅಮ್ಮ ಹೇಳಿದ ಎಂಟು ಸುಳ್ಳುಗಳು ‘ ಪುಸ್ತಕವೇ ಕಾರಣ . ನಿಜ ಹೇಳಬೇಕೆಂದರೆ, ಮಹಾದೇವ ಸ್ವಾಮಿ ಅವರ ಪರಿಶ್ರಮ ಅವರನ್ನು ಯಶಸ್ಸಿನ ಹಳಿಗೆ ತಂದು ನಿಲ್ಲಿಸಿದೆ . ಆದರೆ ಅವರು -” ಅಮ್ಮ ಹೇಳಿದ ಎಂಟು ಸುಳ್ಳುಗಳು” ಪುಸ್ತಕವೇ ತಮ್ಮ ಯಶಸ್ಸಿಗೆ ಕಾರಣ ಎಂಬಂಥ ದೊಡ್ಡ ಮಾತು ಹೇಳುವ ಮೂಲಕ ನನ್ನ ಪುಸ್ತಕಕ್ಕೆ ಒಂದು ಚಿನ್ನದ ಗರಿ ಸಿಕ್ಕಿಸಿದ್ದಾರೆ . ಮಹಾದೇವ ಸ್ವಾಮಿ ಅವರ ಯಶೋಗಾಥೆ ಎಲ್ಲ ಕಿರಿಯರಿಗೂ ಮಾರ್ಗದರ್ಶಿಯಾಗಲಿ ಎಂಬುದು ನನ್ನ ಪ್ರಾರ್ಥನೆ .