ಸ್ಮಶಾನ ಶಿವ 

ಲಕ್ಷ್ಮಣ್

ಶಿವಕಾಶಿಯ ಪಟಾಕಿ ಮಳಿಗೆಯ ಪೋರ
ದೀಪಾವಳಿಯ ದಾಸ್ತಾನು ಖಾಲಿಯಾದ
ಮಾರನೆಯ ದಿನ ಮೈ ಗಂಟಿದ ಗಂಧಕದ
ಘಮ ತೊಳೆಯಲು ನದಿ ನೀರಿಗಿಳಿಯುತ್ತಾನೆ

ಕಪ್ಪು ಬೂದು ಬಣ್ಣದ ಗಂಧಕ
ಮೈಗೆ, ಕೈಗೆ, ಮೂಗಿಗೆ ,ಮುಸುಡಿಗೆ, ಮೆತ್ತಿಕೊಂಡು ಹೊಳೆಗೆ ಈಜು ಹೊಡೆಯಲು ನಡೆದು ಹೋಗುತಿದ್ದರೆ
ಈಗ ತಾನೇ ತಪಸ್ಸಿನಿಂದೆದ್ದು ಬಂದ
ಹಗಲು ವೇಷದ
ಸ್ಮಶಾನ ಶಿವನಂತೆ ಕಾಣುತ್ತಾನೆ
ಬೀಡಿ ಸೇದಲೆಂದು ಅಕಸ್ಮಾತ್
ಇವನ ಪಕ್ಕಯಾರಾದರೂ ಬೆಂಕಿ ಕಡ್ಡಿ ಗೀರಿದರೆ
ಇವನೇ ಅರೆಗಳಿಗೆಯಲ್ಲಿ
ಮಾನವ ಬಾಂಬಿನಂತೆ ಢಮಾರ್!! ಆಗಬಹುದು

ಎಷ್ಟು ಮುಳುಗುಹಾಕಿ ಮಿಂದರೂ
ನಿನ್ನೆರಾತ್ರಿ
ಊರೆಲ್ಲ ಬೆಳಗಿದ ಕಾರ್ತೀಕದ ದೀಪದ ಸೊಡರು
ಕಣ್ಣಿಂದ ಕರಗುತಿಲ್ಲ
ಬರೀ ಬೆಳಕೇ?
ಕಣ್ಣೇ ಕಾಣದಂತ ಪ್ಲಢ್ ಲೈಟಿನಂತಹ
ಬೆಂಕಿ
ಬಾಣ,ಬಿರುಸು,ಮುತಾಪು,ಸುರ ಸುರ ಬತ್ತಿ
ಭೂ ಚಕ್ರ ಅಟಂ ಬಾಂಬು .
ಸಾಲು ಸಾಲು ದೀಪ ಹಾಡು ಹಸೆ
ಹೊಚ್ಚ ಹೊಸ ಬಟ್ಟೆ ಪಚ್ಚೆ ಕರ್ಪೂರ
ಲಕ್ಷ್ಮಿ ಪೂಜೆಯ ಪ್ರಸಾದ
ಮಿಕ್ಕಿ ಉಳಿದಿದ್ದರೆ ಇವನ ಪಾಲಿಗೂ ಆದೀತು
ಆ ದಿನದ ಹಬ್ಬದೂಟ.

ಊರೆಲ್ಲ ಹಾಡಿ ಕುಣಿದು ದಣಿದು
ನಶೆಯಲ್ಲಿ ಮಲಗಿದಾಗ ಪಾಟೀ ಚೀಲವ ಹಾಕುವ ಬಗಲಿಗೆ
ಚಿಂದಿ ಆಯುವ ಚೀಲ ಏರಿಸಿಕೊಂಡು ತನ್ನ
ದೈವವ ಹುಡುಕುತ ಅಲೆಯುವ
ಯಾರೋ ಬಿಸಾಕಿದ ಹಳೆಯ ಟೆಲಿಫೋನ್ ಡೈರಿಯಲಿ ದೇವರ ವಿಳಾಸ ಹುಡುಕವ.

ಬಸಿರು ಬಾಣಂತಿಯ
ಹಸಿ ಗೂಸಿನ ನೆತ್ತಿಗಿಲ್ಲದ ಎಣ್ಣೆ
-ಯ
ಸಾಲು ಸಾಲು ದೀಪಗಳು ಆ ಬದಿಯ
ಕಂಪೌಂಡಿನೊಳಗಡೆ ತಣ್ಣಗೆ ಉರಿಯುತಿವೆ.

ಹರಿವ ನದಿಗಾದರೂ ಗೊತ್ತುಂಟೆ
ಹರಿಯ ವಿಳಾಸ
ಖಾಲೀ ಹಾಳೆಯ ಮೇಲೆ
ದೇವರ ಚಿತ್ರವ ಬರೆದು ಹೀಗೆ ನಟ್ಟುನಡುನೀರಿನ
ಮೇಲೆ
ಕಾಗದದ ದೋಣಿಯ ಮಾಡಿ ತೇಲಿ ಬಿಟ್ಟಿರುವನು
ಮುಂದಿನ ದೀವಳಿಗೆಗಾದರೂ ದೇವರು
ಈ ಮಾರ್ಗ ವಾಗಿ ಬಂದೇ ಬರಬಹುದು.