ಕುಸುಮಾ ಪಟೇಲ್ 

ನಾನು ಜನಕನಿಗೆ ಸಿಕ್ಕ ಜಾನಕಿಯಂತೆ
ಮುಖ ಮುಕ್ಕಾದರೇನು
ಮೈ ತುಕ್ಕು ಹಿಡಿದರೇನು
ದೇಹ ನಜ್ಜುಗುಜ್ಜಾದರೇನು
ನಾನು ನಾನೇ

ನಾನು ಎಕ್ಸಾಕ್ಟ
ಎಸ್ ಎಲ್ ಆರ್
ಕ್ಯಾಮರಾಗಳ ಪಿತಾಮಹ
ಹಿಂದಿನ ಛಾಯಾಗ್ರಾಹಿಯ
ಅಪರೂಪದ ಸಂಗಾತಿ

ಕೇಳಿರಬಹುದು ನೀವು
ಮಹಾಯುದ್ಧದ ಘನಘೋರಗಳನ್ನು
ನಾ ಹಿಡಿದಿಟ್ಟ ಸತ್ಯಗಳನ್ನು
ಇತಿಹಾಸದ ಪುಟಗಳಲ್ಲಿ ದಾಖಲಿಸಿದ
ಚಿತ್ರಗಳನ್ನು

ಇತಿಹಾಸ ದಾಖಲಿಸಿದ ನಾ
ನಿಮ್ಮ ಮುಂದೆ
ಈಗ ಇತಿಹಾಸವಾಗಿ

ಹುಟ್ಟಿದ್ದು ಜರ್ಮನಿಯ ಡ್ರೆಸ್ಡೆನ್ನಲ್ಲಿ
ಬದುಕಿದ್ದು
ಗಲಿವರನ ಕಾಲದಲ್ಲಿ
ಈಗ ಇದ್ದೇನೆ
ನಿಮ್ಮ ಮುಂದೆ
ಸಂಗ್ರಹಣೀಯ ಕ್ಯಾಮರಾವಾಗಿ

ಜೀವನ ಕ್ಯಾಮರಾದ ಹಾಗೆ
ಹಿಡಿದಿಡಬೇಕು ಮುಖ್ಯವಾದದ್ದನ್ನು
ಬದುಕಿನ ಇತಿಹಾಸವನ್ನು
ಅದಕೆ
ಈ ಎಲ್ಲವೂ ಮುಖ್ಯ
ಕಳೆದು ಹೋದದ್ದು, ಮತ್ತೆ ಬಾರದ್ದು
ಕಾಲ, ವಸ್ತು, ಜನ ಎಲ್ಲಾ

ಅದಕೇ ಈಗ
ಹಳೆಯದಕೆ ಹೊಸ ಬೇಡಿಕೆ
ಅಜ್ಜನ ಪಾಕೆಟ್ ವಾಚ್
ಅಜ್ಜಿಯ ಕುಟ್ಟಾಣಿ
ಅಪ್ಪಾಜಿಯ ಮುಗಟ
ಅಮ್ಮನ ಬೆಂಡೋಲೆ
ಮುತ್ತಜ್ಜನ ತಿಜೋರಿ
ಹಳೆಯ ಅಡ್ಡಣಿಗೆ, ಗಂಗಾಳ
ಹೀಗೆ- ಹಳತಾದಷ್ಟೂ ಹೆಚ್ಚುವ ಹಾಗೆ
ಹಳೆಯ ವೈನಿನ ಹಾಗೆ

ಈಗಿನ ಮಕ್ಕಳು
ನನ್ನ ಹಿಂದೆ ಮುಂದೆ ತಿರುಗಿಸಿ
ಮುಟ್ಟಿ
ಹೌ ನೈಸ್, ಹೌ ಕ್ಯೂಟ್
ಎಂದು ಸಂಭ್ರಮಿಸಿ
ಫೋಟೋ ಕ್ಲಿಕ್ಕಿಸಿದಾಗ
ಒಳಗೊಳಗೇ
ಸಣ್ಣ ಸಂಭ್ರಮ

ನಾ ಕಂಡ ಕ್ಯಾಮರಾ ಕಣ್ಣಲ್ಲೆ
ಈಗ ಚಿತ್ರವಾಗಿ ನಾನು !!
ನನ್ನ ನಾ ಕಂಡಂತೆ
ಮತ್ತೆ
ಹುಟ್ಟಿ ಬಂದಂತೆ.