ನವೀನ ಸೊರಬ

ನನ್ನ ಸ್ಥಿತಿಯ ಬಗ್ಗೆ
ಕರುಣೆ ಬೇಡ ಗೆಳತಿ
ನನ್ನ ಸೌಂದರ್ಯಾಭಿರುಚಿ
ಅಂತಿಂಥದ್ದಲ್ಲ ಗೊತ್ತಾ
ಒಂದೇ ಕಣ್ಣಲ್ಲಿ ಪ್ರೀತಿ ವಿಶ್ವಾಸವನ್ನು
ದ್ವೇಶ ಅಸೂಯೆಯನ್ನು ಕ್ಲಿಕ್ಕಿಸಿದ್ದೇನೆ
ಕಂಡದ್ದು ಕಂಡ ಹಾಗೇ
ವಸ್ತುನಿಷ್ಠವಾಗಿ ನನ್ನ
ಚೌಕಟ್ಟಿನೊಳಗೆ ಹಿಡಿದಿಟ್ಟಿದ್ದೇನೆ..

ಲಾವೋಸಿನ ಸಿಡಿಯದ ಬಾಂಬು
ಬಾಮಿಯಾನ್ ಬುದ್ಧ
ಟರ್ಕಿಯ ತೀರದ ಮಗು
ದಲೈ ಲಾಮಾ ನಗು
ಕಚ್ಛಾ ತೈಲದ ಸಂಪತ್ತು
ಉಗ್ರರು ಕುಯ್ದಿಟ್ಟ ಕತ್ತು
ಕಂಡದ್ದು ಕಂಡ ಹಾಗೇ
ನನ್ನ ಚೌಕಟ್ಟಿನೊಳಗೆ…

ಬಿರಿಯುವ ಬೀಜ;ಹೊರಡುವ ಚಿಗುರು
ತೂಗುವ ಹಣ್ಣು; ಹರಡುವ ಹಸಿರು
ತುಂಬಿ ನಿಂತ ಫಸಲು;ಅಸ್ಥಿಪಂಜರದ ಹಸಿವು
ಕಾವೇರಿ ಹರಿದಿದ್ದು ; ಬೆಂಕಿ ಉರಿದಿದ್ದು
ಕಂಡದ್ದು ಕಂಡ ಹಾಗೆ
ನನ್ನ ಚೌಕಟ್ಟಿನೊಳಗೆ..

ನನ್ನ ದುಸ್ಥಿತಿಗೆ ಮರುಗ ಬೇಡ ಗೆಳತಿ
ನನ್ನ ಅಭಿರುಚಿ ಅಂತಿಂಥದ್ದಲ್ಲ..