ಮುಳುಗಿಹೋಗಿದ್ದೆ ನಿನ್ನ ಕಣ್ಣ ಕೊಳದೊಳಗೆ..

ರಂಜಿನಿ ಪ್ರಭು

1

ಮುಳುಗಿಹೋಗಿದ್ದೆ
ನಿನ್ನ ಕಣ್ಣ ಕೊಳದೊಳಗೆ..
ಬಹಳ ಕಾಲ
ಅರಿವಾಗಲೇ ಇಲ್ಲ
ನನ್ನ ಪ್ರತಿಬಿಂಬವೇ
ಅಲ್ಲಿ ಮೂಡಿಲ್ಲವೆಂದು

2.
ದಾಂಪತ್ಯದ ಪಗಡೆಹಾಸು ಹಾಸಿ
ಆಡಲು ಕುಳಿತವರು
ನಾವಿಬ್ಬರು
ದಾಳಗಳನ್ನು ಯಾರುಯಾರೋ
ನಡೆಸಿದರು

3.
ಮರಕ್ಕೆ ಹಬ್ಬಿದ ಮಲ್ಲಿಗೆ ಬಳ್ಳಿ
ಆಗಲೇ ಇಲ್ಲ ಬದುಕು
ಮುಳ್ಳಿನ ಪೊದೆಯ
ಮೇಲೇ ಹೂಗಳನು
ಅರಳಿಸಿಕೊಂಡೆವು

4.
ಕಾಣಿಕೆ ನೀಡಿದೆ ನಾನು
ಗುಲಾಬಿ ತೋಟವನ್ನು
ಎಣಿಸತೊಡಗಿದೆ
ಏಕೆ
ಅದರೊಳಗಿನ
ಮುಳ್ಳುಗಳನು

5.
ಸಾವಿರ ಪದಗಳ ಕವಿತೆಗಿಂತ…
ಒಂದು ಮಾತಿನ
ಮೊನಚು ಮನವ
ತಾಕಿದ್ದು ಹೇಗೆ?

6.
ಈ ಹೃದಯದ ಚಿಂತೆ
ಇಲ್ಲ ಬಿಡು..
ಎಲ್ಲ ನೋವು ಅವಮಾನಗಳಲ್ಲೂ
ನಗಲು ಕಲಿತಿದೆ
ಹಾಳಾದ ಈ ಆತ್ಮದ್ದೇ ಕಷ್ಟ
ಸಣ್ಣ ಮುಳ್ಳಿಗೂ
ಘಾಸಿ ಆಗಿಯೇ
ಬಿಡುತ್ತೆ..

7.
ನೀನು ಸೂಚನೆ ಕೊಡುತ್ತಲೇ ಇದ್ದೆ
ತಳಪಾಯವಿಲ್ಲದ
ಮನೆಯ ಕಟ್ಟಬೇಡವೆಂದು
ದಡ್ಡಿಯಂತೆ
ಮಹಡಿಯ ಮೇಲೆ
ಮಹಡಿ ಕಟ್ಟಿ
ಭಯದಲ್ಲಿ
ಬದುಕುತ್ತಿರುವೆ
ನಾನು

8.
ಬದುಕೆಂದರೆ
ಕನಸುಗಳನು
ಕಾಣುತ್ತಲೇ
ಭ್ರಮೆಗಳನು
ಕಳಚಿಕೊಳ್ಳುವುದಾ?

9.
ಹಾಲೂಡಿದ ಎದೆಯಲ್ಲೇ
ನೋವು ಹೆಪ್ಪಾಗುವುದು
ಸಾಗರವ ಸೇರಲು
ಸುಡು ಮರಳ ಮೇಲೇ ನಡೆಯುವುದು
ನಿಸರ್ಗ ನಿಯಮವೇನೋ

10.
ನಾನೀಗ ಆ ಹಳೆಯ ನಾನಲ್ಲ
ನಾನೀಗ ಹೊಸಾ
ನಾನಾಗಿದ್ದೇನೆ
ಇವೆರಡರ ನಡುವೆ
ನನ್ನನ್ನು ನಾನು
ಕಳೆದುಕೊಂಡಿದ್ದೇನೆ

11.
ಖಾತರಿ ಇದೆ ನನಗೆ
ನಿಂತ ಮೇಲೂ
ಈ ಹೃದಯ ನಿನ್ನ
ಹೆಸರನ್ನೇ ಮಿಡಿಯುತ್ತದೆ..

‍ಲೇಖಕರು avadhi

June 9, 2024

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

0 ಪ್ರತಿಕ್ರಿಯೆಗಳು

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This
%d bloggers like this: