ಮಾಲತಿ ಗೋರೆಬೈಲ್
ಮಳೆ ಮತ್ತು…..
ವಿಚಿತ್ರ ಥಂಡಿ ಹವೆಗೆ
ಅರಳಿಬಿಡುವ ನಾಲಿಗೆಯ ರಸಮೊಗ್ಗು
ನಿಗಿನಿಗಿ ಕೆಂಡದ ಮೇಲೆ ಬೆಂದ ಹಲಸಿನ ಬೀಜ,
ಕುರುಕಲು ಹಪ್ಪಳ
ಕೊತಕೊತ ಎಣ್ಣೆಯಲ್ಲಿ ಮುಳುಗೆದ್ದ ಬಜ್ಜಿ
ಏನೇನೋ ತಿನ್ನುವ ಹುಚ್ಚು!!
ಬೆಚ್ಚನೆ ಕಾವು ಕೊಟ್ಟು ಜೀವ ಕಾಪಿಡುವ
ಹೊದಿಕೆಗಳನ್ನೇ ಆವರಿಸಿಬಿಡುವ ಎಚ್ಚರದ ಕನಸು,
ದೂರ ತೀರದ ಇನಿಯನ ಹಂಬಲ
ಒಂದು ಬೊಗಸೆ ಪ್ರೀತಿಗಾಗಿ ಹಪಾಹಪಿ…
ನವಿರು ಭಾವ ಸ್ಪುರಿಸುವ ರಚ್ಚೆಮಳೆಗೆ
ಅದೆಂತಹುದೋ ಕಸುವು,
ಖುಷಿಯೆದ್ದು ಒಳಮನದ ನರ್ತನ….
ಮಾಧುರ್ಯ ಸವಿದು ನಿರುಮ್ಮಳನಾದ ಹೊತ್ತು
ಬಿರುಗಾಳಿಯ ಕೇಕೆ,
ನೀರಿನೊಡಲು ಸೇರಿದ ಜೀವರಾಶಿ
ಊಕ್ಕಿ ಸೂಕ್ಕಿ ಹರಿವ ಕಡಲು
ರೌದ್ರ ತಾಂಡವ….
ಜರ್ರನೆ ಇಳಿದು ಹೋದ ಹುರುಪು,
ಸೂರು-ಬೇರು,ಶೀತಭಾದೆ, ಬಾಯಿಚಪಲ
ಮೋಹ,ಪ್ರೇಮ
ಎಲ್ಲ ಎಲ್ಲವೂ ಜಲಸಮಾಧಿ….
0 ಪ್ರತಿಕ್ರಿಯೆಗಳು