ಕಾವ್ಯ ಎಂ.ಎನ್ ಹೊಸ ಕವಿತೆ- ಭೂಮಿ ಕನ್ಯೆ

ಕಾವ್ಯ ಎಂ.ಎನ್

—-

ದಹಿಸುವ ಅಗ್ನಿಶಿಖೆ

ಪಟ್ಟವೇರಿದ ಘನತೆಗೆ

ಒಳಗೆ ಬೆಂದಳು ಸೀತೆ..

ಹಸಿವಿರಲಿಲ್ಲ ಅವಳಿಗೆ

ರಾಮನದೋ ರಾವಣನದೋ…

ಸೀತೆ!

ಅವಳು ಹುಟ್ಟಿಲ್ಲದವಳು

ಮತ್ತೆ ಸಾವೂ….

ಸುಡುವ ಬೆಂಕಿಗೆ ಬೆಳಕಿ‌ನ ಹೆಸರಿಟ್ಟು

ಕಾಡ ಹಾದಿಗೆ ಜಾರಿದ್ದಳು

ಬೇರು ಬೆಟ್ಟ ಬಯಲು ಶೂನ್ಯ ತಬ್ಬಿದ್ದೆ..

ಮಣ್ಣಹಾದಿಗೆ

ಅವಳ ನಡೆದ ಗುರುತೂ ಇಲ್ಲ…

ಗತದ ಏಕಾಂತ ಲೋಕಾಂತದ ಗದ್ದಲದ ಮಧ್ಯೆ

ಒಂಟಿತನದ ಗುಟುಕು ಉಂಡಳು

ತುತ್ತು ತುತ್ತಲೂ ತಿಣುಕುವ ಕಲ್ಲಿನ ಹರಳು…

ಅಡುಗೆ ಕೋಣೆಯ ಇತಿಹಾಸ

ಶಯ್ಯಾಗೃಹದಷ್ಟು ರೋಮಾಂಚನವಲ್ಲ

ಮರಗಟ್ಟಿದ ಎದೆನೋವು

ಹುತ್ತಗಟ್ಟಿತು ಒಳಗೊಳಗೆ..

ಸೀತೆ ಅಡಗಿಸಿಟ್ಟದ್ದು ಅಲ್ಲಿ ನಿಟ್ಟುಸಿರನ್ನಷ್ಟೇ ಅಲ್ಲ…

ರಾಮನಾದಂತೆ ರಾಮ

ಸೀತೆ ಸೀತೆಯಾಗಲಿಲ್ಲ…

ಅಪಹರಣದ ಗಾಳಿಕಥೆಯಲಿ

ಗೂಢವಾಗಿ ತೇಲಿಹೋದ ಉಪಮೆಗಳ

ಹುಡುಕಲಾಗದು

ಎಲ್ಲಿ ಬಿದ್ದಳೋ ಭೂಮಿಕನ್ಯೆ

ಹಾಳು ಕೊಂಪೆಯಲೋ ತಣ್ಣನೆಯ ತಾವಿಲ್ಲ….

ದಣಿದ ಜಾನಕಿ

ಮತ್ತೊಮ್ಮೆ ಕಾದಳು ಸೀತೆಯಾಗಲು…

ಪರದೆ ಸರಿಯಬೇಕಿತ್ತು..

ಅ ಶೋಕ ವನದ ಸೀತೆಯ

ಸುಡಲಿಲ್ಲ ಅಗ್ನಿ…

ಅವನ ಮುದ್ರೆ ಶುದ್ಧಕಾಯಕ್ಕೆ..

ತಾಕಿದ ಕಿಡಿ ಅಂಗಾಂಗವ ಮುಟ್ಟಿ ಘೋಷಿಸಿತು

ಉರಿದು ಉಳಿದಿರುವುದು ಅಗ್ನಿಕನ್ಯೆ…

ಬದುಕಿನ ಧ್ಯಾನ

ಒಡೆದು ಚೂರಾದ ಸೀತೆಗೆ

ಹೊಸತಲ್ಲ..

ದುಃಖದ ಪರಿಮಳವ

ಭೇಷರತ್ ಆಘ್ರಾಣಿಸಿದವಳು

ಹೋದಲೆಲ್ಲಾ

ಉತ್ಕಟವಾಗಿ ಮುಡಿದದ್ದು

ಬೆಂಕಿಹೂವು…..

‍ಲೇಖಕರು avadhi

November 22, 2023

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

0 ಪ್ರತಿಕ್ರಿಯೆಗಳು

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This
%d bloggers like this: