ಕಳೆದು ಹೋದ ಅಮ್ಮ..

ವಿಜಯಶ್ರೀ ಎಂ ಹಾಲಾಡಿ

**

ಅವಳಿಗೆ ಭಾಸವಾಗುತ್ತದೆ 

ತನ್ನ ನಗುವಲ್ಲಿ

ಮುತ್ತಜ್ಜಿ ಬೆರೆತಂತೆ

ದೊಡ್ಡಮ್ಮ ಚಿಕ್ಕಮ್ಮಂದಿರು

ಕಣ್ಣೊಳಗೆ ಅಡಗಿದಂತೆ

ಲೇಖನಿಯಲ್ಲಿ ಅಜ್ಜಿಯೇ

ಬೆರೆತು ಬರೆದಂತೆ

ಮುಂಗುರುಳ ಹಿಂದೆ ತಳ್ಳಿ

ಅಮ್ಮ ಗೆಲುವಾದಂತೆ

ಅಮ್ಮ ಇರುವ ತನಕ

ಹೇಳುತ್ತಲೇ ಇದ್ದಳು

ಎಳೆ ವಿಧವೆ ಅಜ್ಜಿಯ

ಹೊರೆಕೂದಲ ಹೆರೆದು ಹಾಕಿದ್ದು

ಮುತ್ತಜ್ಜಿಗೆ ಅವಳ ಗಂಡ 

ತುಳಿದು ಅಲ್ಲೇ ಗಡ್ಡೆಯೆದ್ದು

ಕ್ಯಾನ್ಸರಿಗೆ ತಿರುಗಿ ತೀರಿಹೋದದ್ದು

ದತ್ತುಮಗುವನ್ನು ಕಿತ್ತುಕೊಂಡರೆಂಬ

ಕೊರಗಿನಲ್ಲೇ ದೊಡ್ಡಮ್ಮ 

ಹುಚ್ಚಿಯಾದದ್ದು

ಪ್ರೀತಿ ಮಾಡಿ ಮೋಸ ಹೋಗಿ

ಚಿಕ್ಕಮ್ಮ ಕೆರೆಯಲ್ಲಿ ಹೆಣವಾದದ್ದು;

ಬಸುರಿ ಬಾಣಂತಿ ಅಥವಾ ಮುಟ್ಟು

ಇಷ್ಟರಲ್ಲೇ ಕಳೆದುಹೋದ ಅಮ್ಮನೂ

ಗೂರುಬ್ಬಸ ಹಿಡಿದು ಇನ್ನಿಲ್ಲವಾದವಳೇ

ಅಮ್ಮ ಎಚ್ಚರಿಸುತ್ತಿದ್ದಳು

ಮರೆಯಬೇಡ ಮಗಳೇ

ಅಜ್ಜಿಯದೇ ರೂಪ ನಿನಗೆ

ದೊಡ್ಡಮ್ಮನ ಜಾಣ್ಮೆ

ಮುತ್ತಜ್ಜಿಯಂತೆ ಕೆಲಸಗಾತಿ

ಕಥೆ ಕಾವ್ಯ ಚಿಕ್ಕಮ್ಮನ ಬಳುವಳಿ

ಈಗಿಲ್ಲದವರು ಇದ್ದಾರೆ ನಿನ್ನಲ್ಲೆ..

ಬರುತ್ತಾರೆ ಅವರೆಲ್ಲ

ಅವಳ ಕನಸಿಗೆ

ಅಮ್ಮನೊಂದಿಗೆ

ಹೆದರಬೇಡ ಮಗುವೇ

ಅಳಬೇಡ ನಮ್ಮಂತೆ

ನಗು

ಸಂಭ್ರಮಿಸು

ನಿನ್ನ ಪಾಡಿಗೆ ಹಾಡಿಕೋ

ನರ್ತಿಸು

ಬದುಕಿ ಬಾಳು

ಹರಸುತ್ತಾರೆ!

‍ಲೇಖಕರು Admin MM

May 16, 2024

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

0 ಪ್ರತಿಕ್ರಿಯೆಗಳು

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This
%d bloggers like this: