ಒಂಟಿ ಗೋಡೆ ಮತ್ತು ಅವಳ ಸಂಕಟ

ಹಗಲು ರಾತ್ರಿಗಳ ತೆಕ್ಕೆಯಲಿ ನಗಲು ಹೊತ್ತಿಲ್ಲ, ಮಲಗಲು ಮೈಮನಗಳಿನ್ನು ಸತ್ತಿಲ್ಲ.. ಮುಗಿಲು ಬರಿ ಗಾಳಿ ತುಂಬಿದ ಮೋಡಗಳಿಂದ ತುಂಬಿಕೊಂಡಿದೆ. ಮನಸಲ್ಲಿ ಮಣ್ಣಿನ ಮಳೆಯಾಗುವ ಎಲ್ಲ ಮುನ್ಸೂಚನೆಗಳು ಕಾಣುತ್ತಿವೆ.

ಬೀಸುವ ಗಾಳಿಗೂ ಬಗ್ಗದ ಮರವೊಂದು
ಬೀಗುವದನ್ನು ಮರೆತು ಬಾಗಿ ನಿಂತಿದೆ
ಸಾಗುವ ದಾರಿಯಲಿ ಸಾವಿರಾರು ಕಲ್ಲುಗಳು
ಸಾವಿಗೆ ಶರಣಾಗಿ ಮಲಗಿವೆ..
ನಡೆಯುವಾಗ ಎಡವಿದವರ ಎದೆಯಲ್ಲಿ
ಆಗಾಗ ನಡುಕ ಹುಟ್ಟಿಸುತ್ತವೆ.

ಭಾರವಾದ ಎದೆಯಲ್ಲಿ ಭಾವನೆಗಳ ಹರಿವು
ನಿಂತು ಹೋಗಿದೆ
ಗೋರಿಯೊಳಗಿನವರ ಮಾತುಗಳು
ಕಿವಿಗಪ್ಪಳಿಸುತ್ತ ನಗುತ್ತಿವೆ
ಆಸೆಗಳ ಭಾಷೆಯನ್ನರಿಯದ ಬದುಕು
ಬದುಕುವುದನ್ನೆ ಮರೆತು ಕೂತಿದೆ
ನಿದ್ದೆಯಲಿ ನಿತ್ಯವೂ ಸಂಭ್ರಮಿಸುವ ಕನಸೊಂದು
ಕನಸಾಗೆ ಉಳಿದುಹೋಗಿದೆ.

ಅವಳ ಕಿರುಚಾಟದ ಸದ್ಧಿಗೆ
ಒಂಟಿ ಗೋಡೆಯೊಂದು ಕಿವಿಗೊಟ್ಟಿದೆ
ಹದ್ದಿನ ಬಾಯಿಗೆ ಸಿಕ್ಕ ಗುಬ್ಬಿ ಗೂಡಿನಲ್ಲಿನ ಮರಿಗಳ ಹಾಗೆ
ಮನಸೊಳಗಿನ ಮಾತುಗಳಿಗೆ ತುಟಿಗಳಿದ್ದರೂ
ಮೌನ ಕತ್ತು ಹಿಚುಕಿದಷ್ಟು ಸಂಕಟ
ಕತ್ತಲೆ ಮತ್ತು ಬೆತ್ತಲೆಯೊಂದಿಗೆ ಕೈ ಮಿಲಾಯಿಸಿ
ಕುಲು ಕುಲು ನಗುವ ಹಿತ್ತಲ ಹೂವೊಂದು
ಸುತ್ತಲು ಬೇರು ಬಿಟ್ಟಿದೆ..

ಸಂಕಟಗಳ ಸರಮಾಲೆಗೆ ಸಂಗೀತ ಶಾಲೆಯಲಿ
ಸರಿಗಮ-ಪದಗಳ ಜೊತೆಗೆ ಸ್ನೇಹ ಉಂಟಾಗಿದೆ
ಅರಚಿದರೂ ಹಾಡೆ ಕಿರುಚಿದರೂ ಹಾಡೆ
ನೋವಿಗೂ ಸಾವಿಗೂ ಸಾಹಿತ್ಯದ ಸಾಲುಗಳೆ ಸಾಕ್ಷಿ ಹೇಳುತ್ತಿವೆ
ಬೆವರ ಹನಿಗಳಲಿ ಬೆರೆತ ಬದುಕಿನ ಅರ್ಥ
ಬಾಯಿ ಬಡಕೊಳೊರ ದೃಷ್ಟಿಯಲಿ..
ಬರಿ ಸ್ವಾರ್ಥ ಬರಿ ಸ್ವಾರ್ಥ ಬರಿ ಸ್ವಾರ್ಥ…

‍ಲೇಖಕರು Avadhi

July 21, 2021

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

2 ಪ್ರತಿಕ್ರಿಯೆಗಳು

  1. ಸಚಿನ್‌ಕುಮಾರ ಬ.ಹಿರೇಮಠ

    ಬೆವರ ಹನಿಗಳಲಿ ಬದುಕಿನ ಅರ್ಥ…ಜೀವನದ ಕಾಣ್ಕೆಯನ್ನು ಚೆನ್ನಾಗಿ ಕವಿತೆಯಾಗಿಸಿದ್ದೀರಿ‌‌‌…

    ಪ್ರತಿಕ್ರಿಯೆ

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This
%d bloggers like this: