ದೀಕ್ಷಿತ್ ನಾಯರ್

**

(ಮಲಯಾಳಂ ಕವಿತೆಯೊಂದರ ಸ್ಫೂರ್ತಿ)

ಕವಿತೆಯಿಲ್ಲದೆ ಬದುಕಬಹುದಾ?

ಕವಿತೆಯಿಲ್ಲದೆ ಮೊಲೆಯುಣ್ಣುವ ಕೂಸು ನಗುವುದಿಲ್ಲ 

ಹಟ್ಟಿಯೊಳಗಿನ ಹಸುವಿನ ಕೆಚ್ಚಲಿನಲ್ಲಿ ಹಾಲು ಸ್ವರ ಬಿಡುವುದಿಲ್ಲ

ಬೃಂದಾವನದ ಕೃಷ್ಣ ತುಳಸಿ ಅರಳುವುದಿಲ್ಲ

ಒಲೆಯ ಮೇಲಿನ ರೊಟ್ಟಿ ಬೇಯುವುದಿಲ್ಲ; 

ಕವಿತೆಯಿಲ್ಲದೆ ಬದುಕಬಹುದಾ?

ಕವಿತೆಯಿಲ್ಲದೆ ಬದುಕಬಹುದಾ?

ಕವಿತೆಯಿಲ್ಲದೆ ಪ್ರೀತಿ ಹುಟ್ಟುವುದಿಲ್ಲ

‘ಅವಳನ್ನು’ ನೋಡಿಯೂ ನಮ್ಮೊಳಗಿನ ಪ್ರೇಮಿ ನೆಟ್ಟಗಾಗುವುದಿಲ್ಲ 

ಸರಿ ರಾತ್ರಿಗಳಲ್ಲಿ ರಸಿಕತೆಯ ಕನಸುಗಳು ಬೀಳುವುದಿಲ್ಲ

ನಮ್ಮ ಮೈಬಯಕೆ ತೀರುವುದಿಲ್ಲ;

ಕವಿತೆಯಿಲ್ಲದೆ ಬದುಕಬಹುದಾ?

ಕವಿತೆಯಿಲ್ಲದೆ ಬದುಕಬಹುದಾ?

ಕವಿತೆಯಿಲ್ಲದೆ ಎಂದೋ ಸತ್ತ

ಅಪ್ಪನನ್ನು ಮರೆಯಲಾಗುವುದಿಲ್ಲ

ಸರೀಕರ ಎದುರು ಕೂಳಿಗಾಗಿ ಸೆರಗೊಡ್ಡಿ ಗೋಳಿಟ್ಟ ಅವ್ವನ ಚಿತ್ರ

ಕಣ್ಣುಗಳಿಂದ ಕದಡುವುದಿಲ್ಲ

ನಮ್ಮನ್ನು ಅಲ್ಲಾಡಿಸುವ ನೂರಾರು

ಎದೆಗುದಿಗಳು ದೂರವಾಗುವುದಿಲ್ಲ

‘ಬದುಕುಳಿಯುವ’ ಜೀವ ಚೈತನ್ಯ ಉಳಿಯುವುದಿಲ್ಲ;

ಕವಿತೆಯಿಲ್ಲದೆ ಬದುಕಬಹುದಾ?